حقيقه الحوار السرى بين المشير والمرشد..بقلم/هانى حرب
المشير : حنتصرف ازاى دلوقتى يا بدعدع فى الاشاعات
اللى ماليه البلد اننا على علاقه ببعض.
المرشد : مش عارف والله يا سحس بس لازم نشوف حل
نشيل بيه الفكره دى من الادمغه.
المشير : نركب حوار ع الشعب .
المرشد : تركيب الحوارات بعد الثوره صعب اوى والشعب بقى صايع
وبيفقس اى حوار متركب.
المشير : خلاص بلاش حوار ايه رأيك فى سيناريو اكشن جامد اوى
نضرب بعض ونشتم بعض ونتخانق وكده يعنى يا بدعدع .
المرشد : ايدى على ايدك يا سحس وبسرعه قبل ما ولاد ابو اسماعين
يوصلوا للكرسى وانت عارف سمعه لو وصل حيشنيرك انت
اول واحد.
المشير : مانت السبب مش عملتلى فدائى وحسبتها غلط
وقلت مش عاوز رئاسه وحندعم حد من بره ….
اهو لمن بره ولا من جوه واشربوا انتو كمان
وبيسحبوا السجاده من تحت رجليكوا .
فرحتوا اوى بالمجلس عملكوا ايه المجلس عمالين ترغوا وبس ..
يا بدعدع اهم حاجه التنفيذيه مش التشريعيه هى القوه الحقيقيه
وانا اللى افتكرتك نبيه روح كده يا شيخ.
المرشد : والمصحف يا سحس ماهو ذنبى ده رأى المنيل على عينه الكتاتنى ..
ودلوقتى لو رجعنا ف كلامن حيبقى منظرنا ايه
ودى مش اول مره وعكشه وهاله بنت سرحان مش حيرحمونا
المشير : زى ما قولتلك نركب حوار .. قصدى.. سيناريو جامد
له هدفين الاولانى نقع مع بعض
والتانى ترجعوا ف كلامكوا فى موضوع الترشح.
المرشد : وجدتها
المشير : الحقنى بيها
المرشد : نسحب الثقه من الجنزورى
المشير : استعبط بقى ،، ده فاضله شهرين تلاته ويمشى
حنسحب ف ايه ونشكل ف ايه.
المرشد : متستهبلش يا حسين متغلطش انت خدت عليا اوى
صحيح احنا على علاقه ,, بس علاقه محترمه.
المشير : حقك عليا يا عوعو ده من عشمى.
المرشد : ماشى خلاص حفوتها المرادى.
المشير : كمل
المرشد : حنحط العقده ف المنشار .. انا اطلب سحب الثقه
وانت ترفض .. انا اصر وانت تصر.
المشير : لسى ماوصلتش ,,, كمل
المرشد : تقوم تشتمنى ف بيان اقوم انا اهددك بالمليشيات
ونقعد نشتم ونهدد نشتم ونهدد وهكذا ,,,
تقوم تدخل عليهم على طول.
المشير : طب ده كده اول عصفور حنضربه اللى هو يعنى تشويه علاقتنا .
طب والمرشح؟!
المرشد : طبعا انت عارف ان من حقى اشكل حكومه,,, صح؟
المشير : صح يا خويا من حقك.
المرشد : خلاص انا اطلب سحب الثقه عشان اشكل انا حكومه
تقوم انت مترضاش واشد انا وانت تشد .
اقوم ملاقيش قدامى حل ( انا مضطر بقى كده يا سحس )
الا انى اتقدم للرياسه لانك حرمتنى من اى موقع تنفيذى
وبكده بقى عندى مبرر ارجع بيه ف كلامى ههههههههههههه
المشير : نفذ بسرعه
المرشد : وجب ……اطلع بره مكتبى يا حسين .. اطلع بره
المشير : (مذهول )
المرشد : يغمز للمشير بعنيه ويقوله كده وكده .
ليست هناك تعليقات:
إرسال تعليق